Terveh! Nyt mie kerron kuvien kera mitä ruavoin männä netälillä. Enšiarkena havaččeuvuin č 8 aikah. Huomenešverokši join čäijyö ta šöin kakrahuttuo ruahjuušton, mussikan ta oriehavoin kera. Šyön tätä šamua huomenešveruo vähilleh jokahini päivä, toičči oriehavoin jätän iäreh tahi vaihan mussikan manšikkah. Huomenešveron jälkeh mie rupesin luatimah šuomen kielen ta kiäntämisen iččenäisie školaruatoja, kumpaset liityttih kirjuttamiseh ta kielenhuoltoh. Šiitä 12 aikah mänin karjalan kielen šanakirja- ta šanaštoruavon luvennolla, kumpani piettih loitočči Zoomissa. Luvennon jälkeh mie luajin vielä vähän šamoja školaruatoja kuin aijempah. Illalla vielä pešin vuattehie.
Toisarkena mie havaččeuvuin tuaššen č 8 aikah. Huomenešveron jälkeh ruavoin apuniekkana karjalan kielen murtehet kurssin luvennolla. Šit miun čikko tuli Jovenšuuh, kun olima jo aijempah planiiruinun jotta hiän tulou meilä tällä netälillä kostih. Illalla meilä piti männä kinoh kaččomah Super Mario -filmie miän vanhemman čikon ta hänen lapšien kera, ka pahakši mielekši hyö läsittih, niin emmä šit männyn. Šen šijah kaččoma koissa filmin, kumpasen nimi oli Enola Holmes. Še oli ihan hyvä kino. Rupesima jo varahin makuamah šentäh kun tiesimä jotta tulija päivä on pitkä.
No, serotana šit havaččeutuma čikon kera č 4.30 aikah ta läkšimä kuuvven huomenešjunalla Helsinkih. Helsinkissä myö kiersimä laukkoja ta šöimä hyväččäisesti (hampurilaiset ta puikkopotakat). Läkšimä takasin Jovenšuuh č 18:30 junalla. Voin kertuo jotta päivä oli ylen pitkä ta jalat kipiet, kun kävelimä niin äijän! Mie en oštan äijän, ka löyvin čoman vihannan pluatan ta valkiet houšut kešyä varoin.
Nellänäpiänä olin tuaššen apuniekkana luvennolla. Šen jälkeh vietimä čikon kera aikua, ta šiitä illalla mänin tovarissojen kera opaštujien pitoloih, kumpasie kučuttih 8appro. Appro on šemmoni opaštujien tapahtuma, kumpasešša kierretäh buariloissa ta kerätäh leimua pašših. Leiman šuau kaikičči, kun oštau mitänih juotavua tahi šyötävyö, tahi kun ešimerkikši pajattau karaokea. Šiitä illan piättehekši paššie vaštah šuau hualarimerkin, kumpasen voi ommella omih hualariloih. Ta merkkejäki on eriluatušie: mitä enämpi keryät leimoja, šitä ''paremman'' merkin šuat. No, appron jälkeh voi tiettäväini männä vielä pläššimäh jatkoilla, ka iče en tällä kertua männyn. Mukava oli tuaššen hualarit jalašša kul'ailla ympäri Jovenšuuta. Veššelyä oli, ta tiettäväini oli mukavaini nähä opaštujatovarissoja. Eri alan opaštujie oli äijän liikkehellä ta šiäki oli ylen hyvä: päiväni paisto ta oli lämmin.
Piätinččänä mie huokauvuin ta vietin aikua čikon kera. Myö kaččoma filmijä (ešimerkikši Enola Holmes -kinon toisen ošan) ta šöimä mitänih niepšiempäistä. Šuovattana čikko lähti kotih. Mie iellehki huokauvuin ta kisasin miun Nintendo Switch -kisakonsolilla. Mie šuvaičen äijän moista kisua, kummaista kučutah Disney Dreamlight Valley. Šiinä autetah Disney-huahmoja ta šeikkaillah. Še on moine rauhallini ajanvietäntäkisa. No, šuovattana vielä luatima miun vaštinehen kera tulijan netälin ruokaoššokšet ta kaččoma televiisorie. Pyhänäpiänä mie kirjutin tätä tekštie ta luajin školaruatoja, kumpasie en ehtin luatie aijempah netälin aikana. Šiitä vielä vähän šiistimä pirttie, jotta olis mukava alottua tulija netäli.
No, tämmöni kirjutuš tällä kertua. Kommentiiruiče mitä šie ruavoit männä netälillä tahi kerro ollouko tämmösie kirjutuksie mukava lukie. Alla olijan kommenttiošan lisäkši miula voi jättyä kommenttie Instagramissa: @jelenankera. Passibo!
Šanašto: netäli = viikko / čikko = sisko / kostissa = kylässä / opaštuja = opiskelija / enšiarki = maanantai / havaččeutuo = herätä / huomenešvero = aamupala / oriehavoi = (maa)pähkinävoi / kumpani = joka (pronomini) / toiniarki = tiistai / läsie = sairastaa / serota = keskiviikko / laukka = kauppa / pluat’t’a = mekko / nelläšpäivä = torstai / pläššie = tanssia / piätinččä = perjantai / šuovatta = lauantai / kisakonsoli = pelikonsoli / pyhäpäivä = sunnuntai